Panitikang Pinoy: Batas ng Diyos

ni Florante

Diyos --- kawangis mo, nguni, di ka Diyos,

talos mong di lahat... iyong natatalos;

pakatalastasin

at dapat alamin ---

alabok ka lamang, kaya’t sa alabok...

magpakatampok ma’y diyan ka lang tampok.

Hubad kang sa lupa’y sumulpot na hubad,

ganap na hubo ka’t kahubarang ganap;

dapat mong mabatid,

dito sa daigdig...

likas na dahop ka, sa hina ay likas,

kaya’t lumipad ma’y di makalilipad.

Nilikha ka --- hindi upang sa Lumikha,

gumawa’t lampas an ang Kanyang ginawa;

makahapo’t ngayon

at habang panahon,

ang sumpa ng langit ay batas na sumpa

ang masamang pita ay mapapasama....!

Ang kaiyuhan mo’y tanging kaiyuhan,

kinapal sa iyo ng Poong Maykapal;

kahi pa ang mundo,

maging iyung-iyo...

ang kaalaman mo’y isang kaalaman

na sa takdang guhit ay may katakdaan.

Abutin mang pilit, di mo maaabot,

taluktok ng nasang lampas sa taluktok;

anupa’t alamin,

pakatalastasin...

alabok ka lamang at taong alabok,

kaya’t dumiyos ka sa tunay mong Diyos!